Սթիվեն Սփիլբերգը ֆիլմ է նկարահանում Հռոմի Պապի մասին

Հռոմի Պապերը վերջին շրջանում դարձել են ամենապահանջված կինոհերոսները։ Հազիվ էր Պաոլո Սորենտինոն նկարահանել իր «Երիտասարդ Պապը» ֆիլմը՝ Ջուդ Լոուի գլխավոր դերակատարմամբ, երբ հայտնի դարձավ, որ Պապերից մեկի մասին նկարահանվելու է միանգամից երկու ֆիլմ, որոնցից մեկի ռեժիսորը Սթիվեն Սփիլբերգն է։

Դեռևս տարեսկզբին տեղեկություններ տարածվեցին այն մասին, որ հանրահայտ ռեժիսոր Սթիվեն Սփիլբերգը և ոչ պակաս հանրահայտ պրոդյուսեր Հարվի Վայնշթեյնը («Քրեական ընթերցվածք», «Սիրահարված Շեքսպիրը», «Սպանել Բիլլին», «Չիկագո» և այլն) Հռոմի Պապ Պիոս 9-րդի մասին կինոնախագիծ են կյանքի կոչելու։ Սակայն ապրիլին ռեժիսորն ու պրոդյուսերը վիճաբանեցին և բաժանվեցին։ Սփիլբերգը որոշեց նկարահանել նույն անձի մասին պատմող այդ ֆիլմի իր տարբերակը, Վայնշթեյնը՝ մեկ այլ տարբերակ։ Երկու ֆիլմերի նկարահանումներն էլ կմեկնարկեն 2017թ-ին, սակայն առաջինը գործի կանցնի Վայնշթեյնը, ով ռեժիսորական աթոռը վստահել է իսլանդացի Բալթասար Կորմակուրին, իսկ գլխավոր դերը՝ Ռոբերտ դե Նիրոյին։ 

Հարվի Վայնշթեյնն ու Սթիվեն Սփիլբերգը

Ինչ վերաբերում է Սփիլբերգին, ապա նա որպես գլխավոր դերակատարներ հրավիրել է Մարկ Ռայլենսին և գվատեմալացի Օսկար Այզեքին, ով վերջերս նկարահանվել է 1915-ի հայոց ցեղասպանության մասին պատմող «Խոստում» ֆիլմում։ Երկու ֆիլմերի սյուժեների հիմքում էլ Հռոմի Պապ Պիոս 9-րդի հրամանով հրեական ընտանիքից առևանգված 7-ամյա Էդգարդո Մորտարայի կյանքի իրական պատմությունն է, պարզապես Վայնշթեյնի ֆիլմում ներկայացվելու է երեխայի առևանգման և կաթոլիկ դառնալու ժամանակահատվածը, իսկ Սփիլբերգի ֆիլմում՝ արդեն հասուն տարիքի հասած հոգևորական Մորտարայի հետագա ճակատագիրը։ 

Իրականում Սփիլբերգի և Վայնշթեյնի տարաձայնություններն ավելի վաղ պատմություն ունեն։ Հայտնի է, որ Սփիլբերգը մինչ օրս էլ չի մոռացել 1999թ-ի «Օսկարի» մրցանակաբաշխությունը, երբ պրոդյուսեր Վայնշթեյնի «Սիրահարված Շեքսպիրը» վարկանիշով և մրցանակների քանակությամբ գերազանցեց նրա «Փրկել շարքային Ռայանին» ֆիլմին։ Մնում է սպասել, թե այս անգամ երկու հանրահայտ հրեաների մրցակցության արդյունքում ծնված ֆիլմերից որն ավելի հաջողված կլինի։