Պրեմիերան տեղի կունենա սեպտեմբերի 30-ին՝ Amazon-ի վիդեոտիրույթում։
Ընդամենը երկու շաբաթ անց տեղի կունենա ռեժիսոր Վուդի Ալենի առաջին բազմասերիանոց հեռուստաֆիլմի առաջին էպիզոդի համաշխարհային պրեմիերան։ Amazon-ը արդեն հրապարակել է «Ճգնաժամ՝ վեց գործողությամբ» անվանումը կրող այս ֆիլմի էպիզոդի առաջին թրեյլերը, որը լի է Ալենին բնորոշ հեգնախառն հումորով։ Ռեժիսորի վերջին՝ «Աշխարհիկ կյանքը» ֆիլմը դրական արձագանքի արժանացավ կինոքննադատների կողմից, ինչն էլ թույլ է տալիս արձանագրել, որ 2016 թվականն արգասաբեր տարի էր հոլիվուդյան կենդանի դասականի համար։
Կես ժամ տևողություն ունեցող էպիզոդում, որտեղ գլխավոր դերերում հանդես են եկել Վուդի Ալենն ու Էլեն Մեյը, գործողությունները ծավալվում են արվարձանաբնակ պահպանողական մի զույգի շուրջ, որը 1960-ականների ենթամշակույթի չնախատեսված դասընթացներ է ստանում երիտասարդ հիպիի կողմից, ում կերպարը մարմնավորել է Մայլի Սայրուսը։ Թրեյլերում երևում է, թե ինչպես է Մեյի՝ հրեական ծագումով մայրիշխան կերպարը հակադարձվում Սայրուսի դեռահաս սանձարձակությանը։ Մայլիի հերոսուհին նաև առիթը բաց չի թողնում՝ Ալենի հերոսին պարբերաբար «տեղը դնելու» համար։
