Ռոքի լեգենդ Ջենիս Ջոփլինի կյանքը՝ մեծ էկրանին

Ընդամենը 27 տարվա կյանք, ընդամենը չորս երաժշտական ալբոմ, լեգենդար երգչուհու տիտղոս և պատվավոր տեղ բոլոր ժամանակների 50 մեծագույն կատարողների ցանկում․․․ Ռոքի և բլյուզի խենթ արքայադուստր Ջենիս Ջոփլինի բուռն կենսագրությունը ներկայացվելու է մեծ էկրանին։

Ջենիս Ջոփլինի կյանքն առաջին անգամ չէ, որ էկրանավորվում է։ 1979թ-ին ամերիկացի ռեժիսոր Մարկ Ռայդելը նկարահանել է «Ռոուզ» ֆիլմը, որը հանդիսանում է Ջոփլինի կյանքի վերջին տարիների ճշմարտացի արտացոլումը՝ տաղանդավոր Բեթ Միդլերի գլխավոր դերակատարմամբ։ Այս ֆիլմն արժանացել է երեք «Ոսկե գլոբուսի» և չորս անվանակարգում ներկայացվել է «Օսկարի»։ Նոր կինոնախագծում, որի աշխատանքներն արդեն ընթանում են, Ջոփլինի կերպարը մարմնավորելու է 36-ամյա ճանաչված դերասանուհի Միշել Ուիլյամսը («Անիծվածների կղզին», «Կուզիկ լեռը», «Յոթ օր ու գիշեր Մերիլինի հետ»)։ Ռեժիսորը Շոն Դուրկինն է, ով 2012թ-ից կցված է այս կինոնախագծին և ձեռք է բերել հանգուցյալ երգչուհու ձայնագրությունները ֆիլմում օգտագործելու պաշտոնական իրավունքը։ 

 Ջիմի Հենդրիքսը, Ջիմ Մորիսոնը և Ջենիս Ջոփլինը

Ջոփլինը համարվում է բլյուզի լավագույն սպիտակամորթ կատարողը և ռոք երաժշտության պատմության մեծագույն վոկալիստներից մեկը։ Նրա անունը հետմահու հավերժացվել է ռոք-ն-ռոլի Փառքի սրահում և Հոլիվուդի Փառքի պուրակում։ Rolling Stone ամսագիրը նրան ներառել է բոլոր ժամանակների 100 մեծագույն երգիչ-երգչուհիների ցանկում։ Երգչուհու կարճատև կյանքը, որն ընդհատվեց թմրադեղերի կործանիչ չարաշահման հետևանքով, նման էր ամենապայծառ աստղի՝ երկնակամարում վառվելուն ու մարելուն։ Նա ինքը հանդիսանում էր հասարակությանը նետված մի մարտահրավեր՝ սկսած ապրելակերպից ու հագուկապից և ավարտած բոլոր տեսակի պայմանականությունները մերժելու իր խիզախությամբ։ 

Երգչուհու մահվանից հետո նրա մասին գրվեցին բազմաթիվ գրքեր ու հոդվածներ, նկարահանվեցին ֆիլմեր, ստեղծվեցին կտավներ ու քանդակներ։ Տասնյակ հեղինակներ վերջին 40-50 տարվա ընթացքում փորձել են վերլուծել ու հասկանալ Ջենիսի ֆենոմենը՝ նրան մատուցելով երբեմն ճիշտ, երբեմն խեղաթյուրված լույսով։ Թե նոր կինոնախագծի հեղինակներին ու դերակատարուհուն որքանով կհաջողվի առանձնանալ ընդհանուր շարքից՝ պարզ կդառնա հաջորդ տարի, նկարահանումների ավարտից հետո։