«Սև հայելի». նկարահանվել է ամենասպասված հեռուստաֆիլմի շարունակությունը

«Սև հայելի» հեռուստասերիալի երրորդ սեզոնի ամբողջական տարբերակի էքսկլյուզիվ պրեմիերան տեղի կունենա հոկտեմբերի 21-ին Netflix կայքում:

Բրիտանական «Սև հայելի» բազմասերիանոց հեռուստաֆիլմը հայտնի դարձավ ժամանակակից կյանքին, քաղաքականությանն ու տեխնոլոգիաներին նետված իր հեգնական հայացքի շնորհիվ: Հակաուտոպիստական տարրեր պարունակող այս սերիալի յուրաքանչյուր էպիզոդում նոր դերասաններ են, նոր ռեժիսոր և նոր միջավայր, բայց էպիզոդներից յուրաքանչյուրը մյուսի հետ միավորում է արդի իրականությանը, իշխող համակարգերին և հաստատություններին ուղղված անսովոր տեսանկյունը:

Սխալված չենք լինի, եթե արձանագրենք, որ սա վերջին տարիներին նկարահանված ամենաինքնատիպ, խորիմաստ ու սյուրռեալիստական հեռուստաֆիլմերից է: Նախորդ երկու սեզոնները լայն արձագանք ունեցան հանդիսատեսի շրջանում և դարձան առավել հանրահայտ, երբ Netflix-ը տեղադրեց ամբողջական տարբերակներն իր կայքում:

Այժմ արդեն հայտնի է, որ «Սև հայելու» երրորդ սեզոնի պրեմիերան տեղի կունենա հենց այդ հոսքային մեդիա-պորտալում` առաջիկա հոկտեմբերին: Նոր սեզոնի երկու էպիզոդները մինչ այդ կցուցադրվեն սեպտեմբերին մեկնարկելիք Տորոնտոյի միջազգային կինոփառատոնի շրջանակներում: Իր հերթին Netflix-ն արդեն հրապարակել է կադրեր այդ էպիզոդներից, որոնցից մեկի ռեժիսորը Ջո Ռայթն է, ով հայտնի է դարձել «Քավություն» ֆիլմով (գլխավոր դերերում` Ջեյմս ՄըքԷվոյ, Կիրա Նայթլի) և «Հպարտություն ու նախապաշարմունք», «Աննա Կարենինա» վեպերի էկրանավորումներով:

«Սև հայելի» հեռուստասերիալի երրորդ սեզոնի ամբողջական տարբերակի էքսկլյուզիվ պրեմիերան տեղի կունենա հոկտեմբերի 21-ին Netflix կայքում: