Ջենիֆեր Լոուրենսը՝ «Մեծն Գեթսբիի» հեղինակի կնոջ դերում

Դեն Բրաունի համանուն վեպի հիման վրա նկարահանված «Ինֆերնո» ֆիլմի կոմերցիոն հաջողությունն օսկարակիր ռեժիսոր և պրոդյուսեր Ռոն Հովարդին ամենևին չի լիցքաթափել, ավելին՝ նա այժմ զբաղված է միաժամանակ մի քանի նոր կինոնախագծերով, որոնցից մեկը «Զելդա» կենսագրական դրաման է՝ ամերիկացի հանրահայտ գրող Ֆրենսիս Սքոթ Ֆիցջերալդի կնոջ մասին։

Նոր սերնդի ամենավառ կինոդերասանուհիներից մեկը՝ 26-ամյա Ջենիֆեր Լոուրենսը, ով արդեն հասցրել է արժանանալ «Օսկարի», «Ոսկե գլոբուսի» և տասնյակ այլ մրցանակների ամենահեղինակավոր կինոփառատոներում, նկարահանվելու է Ֆրենսիս Սքոթ Ֆիցջերալդի կնոջ՝ Զելդայի դերում։ Նրանք, ովքեր ծանոթ են մեծ գրողի կնոջ կենսագրությանը կամ ընթերցել են Էռնեստ Հեմինգուեյի «Տոն, որը միշտ քեզ հետ է» և Ֆիցջերալդի «Գիշերն անույշ է» վեպերը, կհավաստեն, որ Լոուրենսին բաժին է հասել ամենևին էլ ոչ դյուրին դեր։ Իր անհավասարակշիռ խառնվածքով աչքի ընկնող Զելդան դեռևս երիտասարդության տարիներին սկսեց ունենալ գիտակցության մթագնումներ, որոնք հետագայում վերածվեցին անբուժելի շիզոֆրենիայի և ողջ հետագա կյանքում իսկական տառապանք դարձան կնոջը նվիրված Ֆիցջերալդի համար, ով, ի վերջո, այդ պատճառով կախվածություն ձեռք բերեց ոգելից խմիչքից։ 

Ֆիցջերալդների ընտանիքը

Զելդան ինքն էլ ստեղծագործում էր՝ գրում էր և Ֆիցջերալդի հետ ամուսնանալու ժամանակ արդեն որոշակի ճանաչման էր արժանացել։ Այդուհանդերձ, չնայած բարեկեցիկ կյանքին, նրանց համատեղ առօրյան լի էր սկանդալներով, և զույգը մշտապես հայտնվում էր աշխարհիկ լուրերի ու բամբասանքների առանցքում։ Հայտնի է, որ Ֆիցջերալդն իր ստեղծագործություններում հաճախ է օգտագործել նյութեր Զելդայի անձնական օրագրերից։ Զելդան ապրել է 47 տարի, որից 20-ն անցկացրել է հոգեբուժարաններում։ Նա ամուսնու մահվանից հետո ապրեց ևս 8 տարի և 1948թ-ին դարձավ հոգեբուժարանում բռնկված հրդեհի զոհը։ Հետաքրքրական է, որ Զելդայի կերպարը 1970-ականներին համարվում էր ֆեմինիզմի խորհրդանիշը։ 

Ռոն Հովարդը «Զելդա» նոր կինոնախագծում հանդես է գալու որպես պրոդյուսեր, սակայն բացառված չէ, որ նա կզբաղեցնի նաև ռեժիսորական աթոռը։