The Wall Street Journal պարբերականի տեղեկացմամբ՝ հանրաճանաչ դերասան Լեոնարդո դի Կապրիոն հանդիսանում է ոչ միայն իր, այլև Մառլոն Բրանդոյի՝ 1955թ-ին ստացած «Օսկարի» սեփականատերը։ Այս նորությունն արդեն մեծ աղմուկ է բարձրացրել հանրության շրջանում։
Երբ այս տարի Լեոնարդո դի Կապրիոյին շնորհվեց բաղձալի ու երկար սպասված «Օսկարը»՝ «Վերապրածը» ֆիլմում գլխավոր դերակատարման համար, դեռևս քչերը գիտեին, որ դերասանի տանը պահպանվում է ևս մեկ արձանիկ՝ անկրկնելի Մառլոն Բրանդոյի պարգևը՝ «Նավահանգստում» ֆիլմում նրա գլխավոր դերակատարման համար։ Այս փաստը մամուլին հայտնի դարձավ ընդամենը վերջերս, և շատերն իսկույն վերհիշեցին, որ տասնամյակներ առաջ Բրանդոյի մրցանակը, իրոք, գողացել են, և այն երկար ժամանակ համարվել է անհետ կորած։ Ինքը՝ դի Կապրիոն ի պատասխան հավաստիացրել է, որ արձանիկն իրեն նվիրել են ընկերները՝ ծննդյան 38-ամյակի կապակցությամբ։
Սակայն այս «դետեկտիվ» պատմությունն այդքանով չի ավարտվում։ Խնդիրն այն է, որ 1991թ-ին ԱՄՆ-ում ընդունվել է օրենք, համաձայն որի՝ «Օսկար» ստացած անձը կամ նրա ժառանգորդներն իրավունք չունեն արձանիկը վաճառելու, եթե այն նախապես չեն առաջարկել Կինոակադեմիայի թանգարանին՝ 10 դոլար խորհրդանշական գնով։ Այս օրենքն անհանգստության պատճառ է դարձել դի Կապրիոյի ու Կինոակադեմիայի համար, և դերասանին տեղեկացրել են, որ Բրանդոյի «Օսկարը» պիտի վերադարձվի։ Լեոնարդոն, սակայն, պնդում է, որ ոչ մի մտադրություն չունի իր թանկագին նվերից բաժանվելու՝ անկախ բոլոր գրված ու չգրված օրենքներից։
