Ընդամենը մի քանի ամիս առաջ օսկարակիր ռեժիսոր Քվենտին Տարանտինոն հայտարարել էր, թե «Նողկալի ութնյակից» հետո նկարահանելու է ևս երկու ֆիլմ և ընդմիշտ թողնելու է ռեժիսուրան։ Օրերս նա իր երկրպագուների հետ հրապարակային հանդիպումներից մեկի ժամանակ տեղեկացրել է, որ արդեն աշխատում է այդ երկու ֆիլմերից առաջինի ստեղծման ուղղությամբ։
53-ամյա Քվենտին Տարանտինոն արդեն մի քանի տարի է, ինչ ուսումնասիրում է 1970-ականների ֆիլմերը, քանի որ պատրաստվում է ֆիլմ նկարահանել այդ հետաքրքիր ու հեղափոխական ժամանակաշրջանի մասին։ 1970թ-ը, Տարանտինոյի կարծիքով, շրջադարձային տարի էր համաշխարհային կինեմատոգրաֆի համար, քանզի հենց այդ ժամանակ էր, որ տեղի ունեցավ հին Հոլիվուդի անցումը դեպի նոր Հոլիվուդ։ Այդ փուլը կարելի է համարել, թերևս, 1960-ականներին ծավալված սեքսուալ հեղափոխության գագաթնակետը և շարունակությունը։ Այս փաստի ամենավառ ապացույցը Տարանտինոն համարում է այն, որ էրոտիկ ֆիլմերը «լքեցին» կինոթատրոնները և հասանելի դարձան լայն հանրության համար՝ դրանով իսկ հանդիսանալով հասարակայնության ազատագրման ևս մեկ դրսևորում։
Տարանտինոն խոստովանել է, որ թեպետ իրեն չափազանց հետաքրքրում է կինոյի պատմության և նոր Հոլիվուդի ձևավորման այդ ժամանակահատվածը, սակայն ինքը դեռևս չի կողմնորոշվել, թե ինչ ձևաչափում է իրագործելու իր մտահղացումը։ Չի բացառվում, որ նա նկարահանի ոչ թե գեղարվեստական, այլ վավերագրական ֆիլմ կամ բազմասերիանոց կինոնկար հեռուստատեսության համար։ Ռեժիսորը խոստացել է կողմնորոշվելուն պես այդ մասին տեղյակ պահել կինոսեր հանրությանը։
