Ռոբերտ Ռոդրիգեսն էկրանավորելու է Ջեյմս Քեմերոնի նախագիծը

200 մլն դոլար արժողութամբ այս գիտաֆանտաստիկ ֆիլմի նկարահանումն օսկարակիր Ջեյմս Քեմերոնի վաղեմի երազանքն էր, սակայն նրան բաժին հասավ պրոդյուսերի դերը, իսկ ռեժիսորական աթոռը զբաղեցրեց հանրաճանաչ Ռոբերտ Ռոդրիգեսը։

«Մեղքերի քաղաքը», «Մայրամուտից մինչև լուսաբաց», «Մաչետե» և այլ ճանաչված ֆիլմերի ռեժիսոր, Կաննի և Բեռլինի կինոփառատոների մրցանակակիր Ռոբերտ Ռոդրիգեսը այժմ զբաղված է «Մարտական հրեշտակը» մեծաբյուջե ֆիլմի նկարահանումների նախապատրաստական աշխատանքներով, որոնք ավարտին կհասցվեն 2018թ-ին՝ հանդիսատեսին, ինչպես ակնկալվում է, ապշեցնելով արդի կինեմատոգրաֆի տեխնիկական նվաճումների մասին վկայող ևս մեկ իրագործված նախագծով։ Ջեյմս Քեմերոնը, ով ցանկանում էր սեփական սցենարի հիման վրա նկարահանել այս ֆիլմը, հանդես է գալու որպես պրոդյուսեր։ 

Ռոբերտ Ռոդրիգեսը և Ջեյմս Քեմերոնը

«Մարտական հրեշտակի» հիմնական դերասանական կազմն արդեն ճշգրտված է․ նկարահանվելու են ավստրիացի օսկարակիր դերասան Քրիստոֆ Վալցը («Ազատագրված Ջանգոն», «Անփառունակ տականքները»), բրիտանացի Էդ Սքրեյնը («Գահերի խաղը», «Վիկինգները»), մեքսիկուհի Էյսա Գոնսալեսը («Մայրամուտից մինչև լուսաբաց») և այլ հայտնիներ։ Ֆիլմի իրադարձությունները տեղի են ունենում 26-րդ դարում՝ Մեծ պատերազմից 300 տարի անց։ Գլխավոր հերոս դոկտոր Իդոն պատահաբար հայտնաբերում է կիբորգ կնոջ մոռացված մնացորդներ, վերականգնում է դրանք, և ֆիզիկապես վերստին կյանք առած, սակայն հիշողությունը կորցրած կինը փորձում է մտաբերել այն ամենը, ինչ կատարվել է իր հետ։