«Սուսպիրիան» և երեք աստղային կանայք

Սարսափ-ֆիլմերի ու թրիլերների անկրկնելի վարպետ Դարիո Արջենտոյի «Սուսպիրիա» հանրահայտ կինոնկարը, որի սյուժեի հիմքում 19-րդ դարի անգլիացի գրող Թոմաս դե Քուինսիի ստեղծագործությունն է, կվերաէկրանավորվի՝ Թիլդա Սուինթոնի, Դակոտա Ջոնսոնի և Քլոե Մորեցի գլխավոր դերակատարմամբ։

Նոր սերնդի ճանաչված ռեժիսորներից մեկը՝ Լուկա Գուադանյինոն, ով հանդիսատեսին հայտնի է իր «Մեծ ճողփյուն», «Ես սերն եմ» և այլ ֆիլմերով, այս ամիս կսկսի «Սուսպիրիա» ֆիլմի նկարահանումները։ Ֆիլմի գլխավոր դերերը վստահվել են 19-ամյա խոստումնալից դերասանուհի Քլոե Գրեյս Մորեցին, «Մոխրագույնի 50 երանգները» ֆիլմի սկանդալային դերակատարուհի Դակոտա Ջոնսոնին՝ Մելանի Գրիֆիթի դստերը, և Լուկա Գուադանյինոյի ֆիլմերի դերասանական կազմի մշտական անդամ, օսկարակիր Թիլդա Սուինթոնին։

 Դարիո Արջենտոյի «Սուսպիրիան»

Լուկա Գուադանյինոն առաջին անգամ չէ, որ վերաէկրանավորում է արդեն հայտնի սյուժեները։ Նրա «Մեծ ճողփյունը» ֆրանսիացի ռեժիսոր Ժակ Դերեի՝ 1969թ-ին նկարահանած «Լողավազան» (Ալեն Դելոն, Ռոմի Շնայդեր) ֆիլմի նոր տարբերակն է։ Ինչ վերաբերում է Դարիո Արջենտոյի՝ 1977թ-ին նկարահանած «Սուսպիրիային», ապա այն իր նորարարական ոճով և այլ առանձնահատկություններով համարվում է սարսափ-ֆիլմերի ժանրի կուռքային նմուշներից և գլուխգործոցներից մեկը, որի հետ որակապես մրցակցելը, իհարկե, հեշտ չի լինելու։

Նոր «Սուսպիրիայի» նկարահանումներն ընթանալու են Իտալիայում և Հունգարիայում։ Պրեմիերան տեղի կունենա 2017-ին։