Ժերար Դեպարդիեն կնկարահանվի Յոհան Սեբաստիան Բախի դերում

Դասական երաժշտության սիրահարներին, կինոսերներին և, մասնավորապես, Ժերար Դեպարդիեի երկրպագուներին հաջորդ տարի մատուցվելու է հիանալի անակնկալ․ բրիտանացի կինեմատոգրաֆիստները պատրաստվում են էկրանավորել գերմանացի հանճարեղ կոմպոզիտոր Յոհան Սեբաստիան Բախի կենսագրությունը՝ վերջինիս դերում նկարահանելով մեր օրերի լավագույն դերասաններից մեկին՝ Դեպարդիեին։

Ժերար Դեպարդիեն իր դերասանական հարուստ կենսագրության ընթացքում բազմաթիվ հանրահայտ անձանց կերպարներ է մարմնավորել, բայց անվիճելի է, որ Բախը՝ որպես անհասանելի բարձունք, պիտի նրա դերակատարմամբ մատուցվի իր կերպարի ողջ բացառիկությամբ։ Պետք է խոստովանել, որ այս նոր կինոնախագծի հեղինակները, իրոք, դերասանի առավել քան ճիշտ ընտրություն են կատարել՝ հաշվի առնելով Դեպարդիեի դերասանական փորձը, մասշտաբը և համապատասխան արտաքին տվյալները։ 

Ժերար Դեպարդիեն՝ Սիրանո դը Բերժերակի դերում

Ֆիլմի ռեժիսորը բրիտանացի Էրիկ Սթայլզն է («Լեգենդներ․ Վիշապի դամբարանը», «Երկնագույն արյուն»), սցենարի հեղինակը՝ Ջեֆրի Ֆրիդմանը։ Գերմանացի մեծ կոմպոզիտորի կյանքի մանրամասները ներկայացնող այս ֆիլմը, Դեպարդիեի խոսքերով, անսահման ուրախություն կպարգևի Բախի արվեստի երկրպագուներին։ Դեպարդիեն ինքն էլ այդ երկրպագուների թվում է և խոստովանում է, որ մշտապես ունկնդրում է Բախի ստեղծագործությունները։ Ի դեպ, ֆիլմում նկարահանվելու է նաև նշանավոր Մաքս ֆոն Սյուդովը՝ Ինգմար Բերգմանի սիրելի դերասաններից մեկը, ով հիանալի է հանդես եկել նրա «Յոթերորդ կնիքը», «Ամոթ», «Հաղորդություն», «Աղջկական աղբյուր», «Մորու բացատ», «Դեմք», «Կիրք», «Գայլի ժամը» և այլ ֆիլմերում։ Նկարահանող խմբում ընդգրկված են այլ հանրահայտ անուններ ևս՝ օսկարակիր օպերատոր Վիտորիո Ստորարոն («Ապոկալիպսիսն այսօր», «Կոնֆորմիստը», «Քսաներորդ դար», «Վերջին կայսրը»), մոնտաժոր Թարիկ Անվարը («Գեղեցկություն ամերիկյան ձևով», «Արքան խոսում է», «Կեղծ գայթակղություն») և կոմպոզիտոր Գաբրիել Յարեդը («Ցուրտ լեռը», «Տաղանդավոր միսթր Ռիփլին», «Անգլիացի հիվանդը»)։ 

Բախի մասին ֆիլմի նկարահանումները կսկսվեն հաջորդ տարեսկզբին, իսկ տարեվերջին ֆիլմը կհայտնվի կինովարձույթում։