Նկարահանումները սկսվելու են հաջորդ տարեսկզբին, և շատերն արդեն կանխատեսում են, որ այս ֆիլմի պրեմիերան դառնալու է տարվա ամենասպասված կինոիրադարձություններից մեկը։
Շվեդ գրող Սթիգ Լարսոնի «Միլենիում» բեսթսելեր-եռագրությունը, որը ներառում է «Վիշապի դաջվածքով աղջիկը», «Աղջիկը, ով խաղում էր կրակի հետ» և «Աղջիկը, ով պայթեցնում էր օդային ամրոցները» վեպերը, բացառիկ հանրաճանաչություն է վայելում և թարգմանվել է տասնյակ լեզուներով, իսկ գլխավոր հերոսուհի Լիսբեթ Սալանդերը արդեն վաղուց համարվում է կուռքային կերպար թե՛ իր արտաքին տեսքով, որն ընդօրինակում են նորաձևության աշխարհում, թե՛ խառնվածքով ու ապրելակերպով, որոնք ընդօրինակվում են անկախ ու այլախոհ երիտասարդության կողմից։ Լարսոնի վաղաժամ մահը թույլ չտվեց, որ նա տեսնի իր եռագրության տպագրությունն ու աննախադեպ հաջողությունը, ինչպես նաև ավարտին հասցնի իր հաջորդ վեպը՝ «Աղջիկը, ով թաղվել էր սարդոստայնում»։ Նրա մտահղացումն ավարտին հասցրեց մեկ այլ շվեդ գրող՝ Դավիդ Լագերկրանցը՝ անցյալ տարի հրատարակելով իր «Աղջիկը սարդոստայնում» վեպը։
«Աղջիկը սարդոստայնում» նոր կինոնախագծի իրականացմամբ զբաղվող Sony ընկերությունը ֆիլմի ռեժիսորական աշխատանքը վստահել է ուրուգվայցի երիտասարդ ռեժիսոր Ֆեդերիկո Ալվարեսին, իսկ Լիսբեթ Սալանդերի կերպարի մարմնավորման համար անցյալ տարվանից բանակցում է շվեդ օսկարակիր դերասանուհի Ալիսիա Վիկանդերի հետ։ Ֆիլմի սցենարը գրել է 2004թ-ին «Օսկարի» ներկայացված Սթիվեն Նայթը։
