Օրնելա Մուտին բնակություն է հաստատել Մոսկվայում

Իտալական կինոյի ամենահրապուրիչ դերասանուհիներից մեկը՝ 61-ամյա Օրնելա Մուտին վերջին օրերին դարձել է առաջին կարևորության թեմա ռուսաստանյան լրատվամիջոցների համար՝ այդ երկրում բնակություն հաստատելու իր որոշման պատճառով։

Ընդամենը վերջերս Օրնելա Մուտին Մոսկվա էր ժամանել ճանաչված շոումեն, Comedy Club-ի վաղեմի ներկայացուցիչ Ալեքսանդր Ռևայի տեսահոլովակում նկարահանվելու նպատակով, իսկ այժմ արդեն դիմել է Ռուսաստանի քաղաքացիություն ստանալու խնդրանքով։ Ավելին՝ Մուտին և նրա զուգընկերը՝ հայտնի գործարար Ֆաբրիս Կերերվեն Մոսկվայի կենտրոնական մասերից մեկում ձեռք են բերել 3-սենյականոց բնակարան, որտեղ էլ ապրում են։ 

Օրնելա Մուտին և Ֆաբրիս Կերերվեն

Գործարարի և դերասանուհու սիրավեպը սկիզբ է առել 2008-ին և, չնայած նրանց միջև եղած տարիքային տարբերությանը՝ 11 տարի, նրանք իրենց միանգամայն երջանիկ են զգում, իսկ Մուտին ամեն առիթով խոստովանում է, որ գտել է իր կյանքի միակ իսկական սերը։ Նրանք ծանոթացել են այն ժամանակ, երբ Մուտին հիմնել է սեփական ապրանքանիշ և սկսել է թողարկել թանկարժեք զարդերի ու դիմահարդարման միջոցների հավաքածուներ։ Զույգի գործընկերային հարաբերությունները արագ վերափոխվել են ռոմանտիկ կապի, և Մուտին, ով երեք երեխաների մայր է, արդեն առանց դառնության է հիշում իր նախորդ երկու անհաջող ամուսնությունների մասին։ Կերերվեն գործարար աշխարհում հայտնի է որպես նեթվորքինգի և մարքեթինգի հանճար, իսկ Ռուսաստանում նրան արդեն վաղուց համարում են իրենց երկրում ցանցային մարքեթինգի հիմնադիրը։ Իտալացի գործարարը մեծ ու շահութաբեր բիզնես ունի Ռուսաստանում, և Մուտին շարունակում է հանդիսանալ նրա գործընկերը։ 

1990-ականներին Մուտին կրում էր «աշխարհի ամենագեղեցիկ կին» տիտղոսը, իսկ հիմա նա համարվում է նաև Իտալիայի ամենաազդեցիկ կանանցից մեկը։ Վերջին տարիներին նա քիչ է նկարահանվում, բայց չի բացառում, որ Ռուսաստանում կընդունի նկարահանվելու հետաքրքիր առաջարկներ, եթե այդպիսիք լինեն։ 1979թ-ին, ինչպես հայտնի է, Մուտին նկարահանվել է Գրիգորի Չուխրայի «Կյանքը հրաշալի է» ռուս-իտալական ֆիլմում՝ Ջանկառլո Ջանինիի հետ միասին։