«Ծիրանի ծառ-2017». 31 ֆիլմ՝ 25 երկրից

«Ծիրանի ծառ» վավերագրական ֆիլմերի միջազգային փառատոնն այս տարի կանցկացվի արդեն 3-րդ անգամ։

 ֆրանսիացի նշանավոր կինովավերագրող Ժան Ռուշը,
ում ֆիլմով բացվելու է փառատոնը

«Ծիրանի ծառ» վավերագրական ֆիլմերի միջազգային փառատոնը, որը 2017թ-ին կանցկացվի արդեն 3-րդ անգամ, հոկտեմբերի 1-5-ը հանդիսատեսի ուշադրությանը կներկայացնի 31 ֆիլմ՝ 25 երկրից: Այս տարի 15 կարճամետրաժ և 15 լիամետրաժ վավերագրական ֆիլմերից բաղկացած մրցութային ծրագիրը կցուցադրվի ինչպես երևանյան «Մոսկվա» կինոթատրոնում, այնպես էլ Արագածոտնի մարզի Ուջան գյուղում, որը «Ծիրանի ծառի» անցկացման օրերին կդառնա տոնակատարության վայր՝ բացօթյա ցուցադրություններով, համերգներով, խնջույքներով: Իսկ փառատոնի բացումը տեղի կունենա հոկտեմբերի 1-ին, ժամը 16:00-ին, «Մոսկվա» կինոթատրոնի Կարմիր դահլիճում՝ հանրահայտ «Մի ամռան խրոնիկա» (1961թ) ֆիլմի ցուցադրությամբ՝ նվիրված ֆրանսիացի անվանի ռեժիսոր և մարդաբան Ժան Ռուշի ծննդյան 100-ամյակին: 

Փառատոնին մասնակցության հայտ էր ուղարկել շուրջ 1650 ֆիլմի հեղինակ՝ մոտ 100 երկրից: Թեպետ փառատոնի ուշադրության կենտրոնում ազգագրական և մարդաբանական բովանդակությամբ ֆիլմերն են, այն դիմորդների առաջ չի դնում խիստ ժանրային սահմանափակումներ: Դրա շնորհիվ է, որ այս տարի «Ծիրանի ծառի» պաշտոնական ծրագրում ներառված են ինչպես ավելի ավանդական ազգագրական վավերագրություններ, որոնք չափազանց հետաքրքրաշարժ կերպով ներկայացնում են տարատեսակ մեծ ու փոքր ժողովուրդների կամ համայնքների կյանքն ու կենցաղը, այնպես էլ փորձարարական ֆիլմեր, որոնք ինքնարտահայտման յուրօրինակ ձևերի են դիմում: 

Հոկտեմբերի 1-5-ը «Մոսկվա» կինոթատրոնում և Ուջանում ցուցադրվելիք ֆիլմերին կարող եք ծանոթանալ այստեղ։ Շուտով փառատոնը կհրապարակի նաև ցուցադրությունների ժամանակացույցը: