Սեպտեմբերի 15-20-ը Արագածոտնի մարզի Ուջան գյուղում կանցկացվի «Ծիրանի ծառ» վավերագրական ֆիլմերի IV միջազգային փառատոնը:
Սեպտեմբերի 15-20-ը Արագածոտնի մարզի Ուջան գյուղում կանցկացվի «Ծիրանի ծառ» վավերագրական ֆիլմերի IV միջազգային փառատոնը: Աշխարհի տարբեր երկրներից ժամանած մի քանի տասնյակ կինոգործիչներ կապրեն և կսնվեն հյուրընկալ գյուղացիների տներում, իսկ Ուջանի դպրոցի դահլիճն ու հրապարակը կդառնան հետաքրքիր կինոցուցադրությունների ու բուռն կինոքննարկումների վայր: Բոլոր ֆիլմերը զուգահեռաբար կցուցադրվեն նաև Երևանի «Մոսկվա» կինոթատրոնում: Այսօրինակ կինոփառատոն ունենալու գաղափարը ծագել է երկրի մշակութային կյանքն ապակենտրոնացնելու ձգտումից, քանի որ գյուղերում և փոքր քաղաքներում ապրող բնակչությունը զրկված է համաշխարհային և նույնիսկ հայրենական արվեստի արդի գործընթացներին մասնակից լինելու հնարավորությունից:
ԲԱՑՈՒՄ
Բացման արարողությունը տեղի կունենա սեպտեմբերի 15-ին, 19:30-ին, Ուջանի Զորավար Անդրանիկի անվան հրապարակում: Բացման ֆիլմը՝ ուկրաինացի ռեժիսոր Անդրեյ Զագդանսկու «Վահրիճն ու սև քառակուսին», որը պատմում է հայազգի նկարիչ Վահրիճ Բախչանյանի կյանքի մասին, կցուցադրվի նույն հրապարակում՝ ժամը 20:30-ին: Սա զվարճալի, բայցև թախծոտ վավերագրություն է, որտեղ հարցազրույցներն ու պատմական կադրերը լրացվում են Բախչանյանի կոլաժային անիմացիայի աշխարհով:
ՄՐՑՈՒԹԱՅԻՆ ԾՐԱԳՐԵՐ
Այս տարի փառատոնի լիամետրաժ և կարճամետրաժ ծրագրերում ընդգրկված է 17 ֆիլմ աշխարհի 13 երկրից՝ Ֆրանսիայից մինչև Չինաստան, Ռուսաստանից մինչև Իրան և այլն: Կարելի է ասել՝ այստեղ ներկայացված են վավերագրական կինոյի բոլոր ժանրերը՝ ազգագրական ֆիլմից մինչև կենսագրական, խրոնիկալ-հրապարախոսականից մինչև անիմացիոն վավերագրություններ: Բոլոր ֆիլմերի և հեղինակների մասին տեղեկատվությունը հետզհետե տեղադրվում է փառատոնի կայքում (www.atieff.org) և ֆեյսբուքյան էջում (https://www.facebook.com/ApricotTreeUFF/):
ԱՐՏԱՄՐՑՈՒԹԱՅԻՆ ԾՐԱԳԻՐ
 |
| «Վահրիճն ու սև քառակուսին» |
Երևանի «Գյոթե» կենտրոնի հետ համագործակցությամբ՝ տեղի կունենա նաև գերմանացի մեծ գրող Թոմաս Մանի՝ երեխաների զարմանալի ճակատագրերի մասին պատմող «Փախուստ դեպի կյանք. Էրիկա և Կլաուս Մաների պատմությունը» ֆիլմի հատուկ ցուցադրությունը՝ հեղինակի՝ գերմանացի անվանի վավերագրող, Բեռլինի կինոփառատոնի համակարգող և այս տարվա ժյուրիի անդամ Վիլանդ Շպեկի ներկայությամբ: Վերջինս նաև վարպետության դաս կանցկացնի հանդիսատեսի և կինոուսանողների համար: CineDOC-Tbilisi միջազգային կինոփառատոնի հետ համագործակցության արդյունքում՝ «Ծիրանի ծառի» արտամրցութային ծրագրում տեղ են գտել վերջին տարիների լավագույն ռուսական վավերագրական ֆիլմերից երկուսը՝ «Խարույկներ ու աստղեր» և «Տարօրինակ մասնիկներ»: Իր «Պետրիլա մոլորակը» ֆիլմի հատուկ ցուցադրությունից հետո վարպետաց դասով հանդես կգա նաև փառատոնի անցյալ տարվա դափնեկիր, ռումինացի ռեժիսոր Անդրեյ Դասկալեսկուն։
ՎԱՐՊԵՏԱՑ ԴԱՍԵՐ
 |
| «Վահրիճն ու սև քառակուսին» |
Կինոցուցադրություններին զուգահեռ՝ Երևանի «Գյոթե» կենտրոնում (Մհեր Մկրտչյան 1) լինելու են հանդիպումներ փառատոնի հյուրերի հետ: Ծրագիրը հատուկ այնպես է կազմված, որ հանդիսատեսը հնարավորություն ունենա հանդիպմանը մասնակցելուց մեկ օր առաջ դիտել հյուրի ֆիլմը:
Փառատոնի կազմակերպիչները վավերագրական կինոյի սիրահարների և պարզապես լայն հանդիսատեսի համար նախապատրաստել են բազմաթիվ հետաքրքիր ֆիլմեր ու վարպետության դասեր։ «Ծիրանի ծառ» կինոփառատոնը սիրով սպասում է բոլորին:
Ցուցադրությունների և վարպետաց դասերի մուտքն անվճար է:
