Մել Գիբսոնի հանդեպ Հոլիվուդում տարիներ ի վեր շարունակվող չհայտարարված բոյկոտը, կարծես թե, մոտեցել է ավարտին։ Այդ մասին ազդարարել է The Hollywood Reporter պարբերականը՝ նշելով, որ Գիբսոնի վերջին՝ «Խղճի մտոք» ֆիլմը նրա առաջ վերստին բացել է նախկինում փակված բոլոր դռները և շահավետ առաջարկների մի ամբողջ հոսք ապահովել օսկարակիր ռեժիսորի և դերասանի համար։
Մել Գիբսոնի՝ 10-ամյա ընդմիջումից հետո ներկայացված նոր ռեժիսորական աշխատանքը՝ «Խղճի մտոք» ֆիլմը, որը սեպտեմբերին ցուցադրվել էր Վենետիկի կինոփառատոնի շրջանակներում և արժանացել բարձր գնահատականի, Հոլիվուդում ևս ցնծությամբ է ընդունվել՝ դասվելով 2017թ-ի «Օսկարի» հիմնական հավակնորդների շարքը և անցյալում թողնելով ռեժիսորին երկար ժամանակ հետապնդող persona non grata-ի պիտակը։ Գիբսոնն արդեն իսկ գործնական առաջարկներ է ստացել երկու խոշոր ընկերությունից, ինչը վկայում է նրա հարկադիր մեկուսացման և Հոլիվուդի՝ նրան պատժելու քաղաքականության ավարտի մասին։ Շատերն են հիշում, որ Գիբսոնի դեմ շարունակվող բոյկոտի պատճառը նրա հակահրեական հայտարարություններն էին, որոնք նա արել էր ոչ սթափ վիճակում մեքենա վարելու համար ձերբակալվելիս։
Այդուհանդերձ, Գիբսոնը կարողացավ իռլանդացու համառությամբ ապացուցել, որ ինքը ցանկացած իրավիճակում ընդունակ է նկարահանելու դիտարժան ու վառ ֆիլմեր, և նույնիսկ հակառակորդները խոստովանեցին, որ նրա կինեմատոգրաֆիական տաղանդն անառարկելի է։ Այդ փաստի ամենաակնառու ապացույցը, թերևս, այն է, որ նրա «Խղճի մտոք» ֆիլմի պրոդյուսերը ծագումով հրեա Դևիդ Փերմուտն է, ով Գիբսոնի մասին ասել է․ «Կարծում եմ, որ Մելը պարզապես ճիշտ չի հասկացվել մարդկանց կողմից։ Սակայն, որքան էլ նրան վատ ճանաչեն ու դատապարտեն, ոչ ոք ի զորու չէ նրանից խլել տաղանդը»։
