Ամերիկացի գրող Դեն Բրաունի՝ 2013թ-ին հրատարակված «Ինֆերնո» վեպի համանուն էկրանավորումը գերազանցել է այս կինոնախագծի հեղինակների բոլոր սպասելիքները՝ աշխարհի 41 երկրների կինովարկանիշային ցանկերում շահութաբերության և հանդիսատեսի թվաքանակի առումով զբաղեցնելով առաջին հորիզոնականը։
Այս պահի դրությամբ՝ «Ինֆերնոն», ինչպես հաղորդում է արտերկրի մամուլը, գրեթե ստվերել է ընթացիկ տարվա մյուս բոլոր կարևոր պրեմիերաները և ամուր հաստատվել 2016թ-ի ամենավարկանիշային ֆիլմերի համաշխարհային լավագույն տասնյակի առաջին հորիզոնականում։ Ֆիլմը մեծ էկրան է բարձրացել ընդամենը օրեր առաջ՝ հոկտեմբերի 8-ին, սակայն արդեն իսկ հասցրել է ապահովել 50 մլն դոլարի շահույթ՝ ցուցադրվելով աշխարհի 53 երկրների կինոթատրոններում։ Օսկարակիր ռեժիսոր Ռոն Հովարդի աղմկահարույց եռագրության նախորդ երկու ֆիլմերը՝ 2006թ-ին նկարահանված «Դա Վինչիի գաղտնագիրը» և 2009թ-ին նկարահանված «Հրեշտակներն ու դևերը» ապահովել էին համապատասխանաբար 758 և 489 մլն դոլարի շահույթ։
Այս ֆիլմի գլխավոր դերում ևս, ինչպես նախորդ երկու ֆիլմերում, հանդես է եկել Թոմ Հենքսը, իսկ երիտասարդ բժշկուհի Սիենա Բրուքսի կերպարը մարմնավորել է Ֆելիսիթի Ջոնսը։ Ռեժիսոր Ռոն Հովարդը սկզբում չի ցանկացել ստանձնել վեպի էկրանավորումը, սակայն ավելի ուշ մտափոխվել է և արդյունքում հանդիսատեսին մատուցել է մի դիտարժան ֆիլմ, որտեղ Դանթե Ալիգիերիի «Աստվածային կատակերգության» հայտնի «Ինֆերնոն»՝ «Դժոխքը», մեզ պատկերանում է ժամանակակից իրականության համատեքստում, իսկ հերթական գաղտնագրի լուծման համար որպես բանալի է ծառայում Սանդրո Բոտիչելիի «Դժոխքի քարտեզը» նկարը։
