Սեմ Մենդեսն էկրանավորում է վերջին տարիների լավագույն բեսթսելերը

Բրիտանացի օսկարակիր ռեժիսոր Սեմ Մենդեսը պատրաստվում է մեծ էկրան տեղափոխել վերջին տարիների ամենասիրված բեսթսելերներից մեկը՝ ամերիկացի գրող Ջես Ուոլթերի՝ 2012թ-ին հրատարակված «Սքանչելի ավերակները» վեպը։

Հանրաճանաչ ռեժիսոր և պրոդյուսեր Սեմ Մենդեսն առաջին անգամ չէ, որ իր ֆիլմերի սյուժեն ընտրելիս օգտագործում է բեսթսելերները։ Ռիչարդ Յեթսի «Փոփոխությունների ճանապարհը» և Մաքս Ալան Քոլինզի «Անիծված ուղին» վեպերի հաջողված ու մի շարք մրցանակների արժանացած էկրանավորումներից հետո նա մտադիր է ֆիլմ նկարահանել ամերիկացի ժամանակակից գրող Ջես Ուոլթերի «Սքանչելի ավերակները» վեպի հիման վրա։ Ջես Ուոլթերն իր գործունեության սկզբում աղմկահարույց համբավ է ձեռք բերել որպես խիզախ լրագրող, ով բացահայտել է բազմաթիվ փաստեր կազմակերպված հանցավորության վերաբերյալ։ Նրա վեպերն ու սցենարները ևս դետեկտիվ ժանրում են, ընդ որում՝ Ուոլթերի յուրաքանչյուր նոր վեպն անփոփոխ ճանաչվում է «Տարվա լավագույն գիրք» և հիացմունքով ընդունվում ընթերցողի կողմից։ 

Սեմ Մենդեսը նախկին կնոջ՝ Քեյթ Ուինսլեթի հետ

2012թ-ին արտասահմանյան մամուլը գրում էր, որ «Սքանչելի ավերակներով» հիացած են բոլորը՝ դժվարահաճ քննադատներից մինչև պոստմոդեռնիստական ոճի, դետեկտիվ ժանրի ու ռոմանտիկ պատմությունների սիրահարներ։ Ուոլթերն այս վեպում միավորել է ռետրոն, ռոմանտիկան, ժամանակակից դինամիկ զարգացումներն ու սուր հեգնանքը։ 26 երկրներում հրատարակված և 28 լեզվով թարգմանված բեսթսելերը, իհարկե, չէր կարող չգրավել կինոպրոդյուսերների ուշադրությունը։ «Գեղեցկություն ամերիկյան ձևով» օսկարակիր ֆիլմի ռեժիսոր Սեմ Մենդեսը այս նոր կինոնախագծում հանդես է գալիս որպես պրոդյուսեր, սակայն ծրագրում է զբաղեցնել նաև ռեժիսորական աթոռը։ Վեպի հեղինակ Ջես Ուոլթերը ևս ֆիլմի պրոդյուսերների շարքում է։ 

Իրադարձությունները սկիզբ են առնում 1962թ-ին Իտալիայում, որտեղ ժամանում է մի հիասքանչ ամերիկուհի, ով, ինչպես պարզվում է, դերասանուհի է և մահացու հիվանդ է։ Հյուրանոցատիրոջ որդին անմիջապես սիրահարվում է։ Հետագա իրադարձությունները ծավալվում են արդեն մեր օրերում, երբ տարեց իտալացին՝ երբեմնի սիրահարված տղան, գալիս է Հոլիվուդ և սկսում է տեղեկություններ հավաքել այն դերասանուհու մասին, ում հետ ծանոթացել էր 50 տարի առաջ իր հայրենիքում։ Միահյուսելով երկու տարբեր դարաշրջան՝ հեղինակը հիշատակում է նաև հանրահայտ «Կլեոպատրա» ֆիլմը՝ Էլիզաբեթ Թեյլորի և Ռիչարդ Բարթոնի մասնակցությամբ, և Հռոմում նկարահանված այդ ֆիլմը հետաքրքիր մի դրվագով կապում է իր վեպի հերոսների ճակատագրի հետ։