Հոլիվուդյան ճանաչված դերասան Վուդի Հարելսոնը որոշել է ուժերը փորձել ռեժիսուրայում և շուտով սկսելու է իր առաջին՝ «Լոնդոնում կորսվածները» ֆիլմի նկարահանման աշխատանքները։
«Իսկական դետեկտիվ», «Քաղցած խաղեր», «Սա ծերուկների տեղը չէ», «Ժողովուրդն ընդդեմ Լարի Ֆլինթի», «Խաբեության պատրանք» և այլ հանրահայտ ֆիլմերի դերասան Վուդի Հարելսոնն առայժմ խուսափում է ժամանակից առաջ անցնել և մանրամասներ հրապարակել իր նոր կինոնախագծի վերաբերյալ։ Սակայն նա չի թաքցնում, որ ռեժիսորի կարգավիճակում հայտնվելն իր վաղեմի երազանքն էր։ Հարելսոնը, ով վերջերս նկարահանվել էր Ռոբ Ռայների «ԼԲԴ» (Լինդոն Բեյնս Ջոնսոն) քաղաքական դրամայում, անհամբերությամբ սպասում է իր մասնակցությամբ մեկ այլ՝ նույնպես Ռոբ Ռայների հեղինակած «Ցնցում և թրթիռ» ֆիլմի նկարահանումների ավարտին, որպեսզի սկսի կյանքի կոչել իր երազած կինոնախագիծը։
