2002թ-ին ամերիկացի օսկարակիր ռեժիսոր Օլիվեր Սթոունն իր նկարահանող խմբի հետ այցելեց Կուբա, իսկ 2003թ-ին ներկայացրեց Ֆիդել Կաստրոյին նվիրված «Կոմանդանտե» վավերագրական ֆիլմը։ Ցուցադրվեց, սակայն, ֆիլմի ոչ ամբողջական տարբերակը։ Այժմ, 14 տարի անց, ֆիլմը համացանցում հայտնվել է չգրաքննված տարբերակով։
Օլիվեր Սթոունի «Կոմանդանտե» վավերագրական ֆիլմի 1-ժամանոց տարբերակը, որը մասնակիորեն ֆինանսավորվել էր ամերիկյան հանրաճանաչ HBO հեռուստաընկերության կողմից, նախքան եթեր հեռարձակվելը ցուցադրվեց Սանդենսի կինոփառատոնի շրջանակներում և բավականին մեծ արձագանքի արժանացավ իր անկեղծ քաղաքական մոտեցման շնորհիվ։ Այդուհանդերձ, Սթոունը պատրաստել էր ոչ թե 1-ժամանոց, այլ 1,5-ժամանոց ֆիլմ, որը, Արևմուտքում Ֆիդել Կաստրոյի քաղաքական գործունեության և կերպարի հանդեպ առկա ոչ միանշանակ վերաբերմունքի պատճառով, որոշակիորեն կրճատվել ու խմբագրվել էր։ Նոյեմբերի 25-ին, երբ Կուբայի նախկին նախագահ և լեգենդար հեղափոխական գործիչ Ֆիդել Կաստրոն 90-ամյա հասակում կնքեց մահկանացուն, ֆիլմի՝ մինչ այդ երբևէ չցուցադրված ամբողջական տարբերակը տարածվեց համացանցում և հասանելի դարձավ լայն հանրության համար։
