Մարդիկ և փաստեր. Սոֆի Լորեն և Վել Էյվերի՝ Սեպուհ Տեր-Աբրահամյան

լուսանկարում՝ Վել Էյվերին և Սոֆի Լորենը «Համարձակություն» ֆիլմում, 1985թ

Ավելի քան կես դար նա նկարահանվում էր ամենահանրահայտ ֆիլմերում ու սերիալներում՝ մարմնավորելով բազմատեսակ կերպարներ՝ օրինապահից մինչև օրինազանց, ոստիկանից մինչև հանցագործ և այլն։ Մի անգամ, 1982թ-ին, համաձայնել է խաղալ նույնիսկ Թալեաթ փաշայի դերը՝ համարելով, թե միայն ցեղասպանություն վերապրած հայը կարող է համոզիչ ներկայացնել այդ սարսափելի մարդուն և հանդիսատեսին ցույց տալ նրա ոճիրը, որի հետևանքները կրել են ինքն ու իր ընտանիքը։ Վել Էյվերին, մուտք գործելով կինոյի աշխարհ, ինչպես շատ-շատերը, սկսեց նկարահանվել օտարահունչ կեղծանունով, սակայն նա՝ Սեպուհ Տեր-Աբրահամյանը, ում ընտանիքը մի կերպ փրկվել էր ջարդերից և հանգրվան գտել ԱՄՆ-ում, ողջ կյանքում հավատարիմ էր իր արմատներին, տիրապետում էր հայերենին, կապ էր պահպանում հայ համայնքի հետ և զբաղվում բարեգործությամբ։ 

Վել Էյվերին՝ «Հրաշալի յոթնյակը» ֆիլմում

Նա նկարահանվել է ավելի քան 150 ֆիլմում և 300-ից ավելի հեռուստանախագծերում։ Վել Էյվերիի մասնակցությամբ ֆիլմերի շարքում են Ջոն Սթյորջեսի «Հրաշալի յոթնյակը», Մարտին Ռիթի «Հադը», Սիդնի Լյումետի «Անդերսոնի կինոժապավենները», Ֆրանկլին Ջեյմս Շաֆների «Թիթեռնիկը», Սթյուարտ Ռոզենբերգի «Ծիծաղող ոստիկանը» և «Ամիտիվիլի սարսափը, Սթենլի Դոնենի «Երջանիկ Լեդի նավակը», Ջոն Հյուսթոնի «Վերջին գնդակը», Ջորջ Կոսմատոսի «Կոբրան», Մայք Նյուելի «Դոննի Բրասկոն» և այլն։ Էյվերին ամերիկյան անկախ կինոյի ամենափայլուն ներկայացուցիչներից մեկի՝ ռեժիսոր Ջոն Կասավետիսի սիրելի դերասաններից էր և հաճախակի էր նկարահանվում նրա ֆիլմերում՝ «Չափից դուրս ուշացած բլյուզ», «Միննին և Մոսկովիցը», «Դեմքեր», «Չինացի բուքմեյքերի սպանությունը», «Գլորիա»։ Կինոյում Էյվերիի խաղընկերներն են եղել Սիդնի Պուատիեն, Քըրք Դուգլասը, Էնթոնի Քուինը, Յուլ Բրիները, Սթիվ ՄըքՔուինը, Փոլ Նյումենը, Բերթ Լանկաստերը, Ֆրենկ Սինատրան, Շոն Քոներին, Դասթին Հոֆմանը, Ջին Հեքմենը, Բեն Գազարան, Ռոբերտ Ռեդֆորդը և այլք։ 
Էյվերին բարեկամական հարաբերություններ ուներ Ուիլյամ Սարոյանի հետ, ով 1975թ-ին նրա համար նույնիսկ փոքրիկ պիես էր գրել, որը դերասանին հաջողվեց բեմականացնել տարիներ անց։