«Ես միշտ ցանկացել եմ, որ իմ ֆիլմերը դիտող միլիոնավոր մարդիկ դիտեն նաև միլիոնավոր այլ ֆիլմեր»: Քվենտին Տարանտինո
1. Տարանտինոյի մայրը, ով իր առաջնեկին լույս աշխարհ է բերել ամուսնալուծվելուց հետո՝ ընդամենը 16 տարեկան հասակում, սկզբում ցանկացել է որդուն անվանել Քվինտ՝ «Հրաձգության ծուխը» սերիալի հերոսի անունով, բայց հետո մտափոխվել և նրան անվանել է Քվենտին՝ Ուիլյամ Ֆոլքների «Աղմուկ և ցասում» հանրահայտ վեպի հերոս Քվենտին Քոմփսոնի պատվին։ Հետագայում Քվենտինի մոր երկրորդ ամուսինը որդեգրել է տղային, բայց նա նախընտրել է պահպանել իր կենսաբանական հոր ազգանունը, թեպետ երբևէ չի շփվել վերջինիս հետ։
2. Որոշ տեղեկությունների համաձայն՝ Տարանտինոյի ինտելեկտի գործակիցը հավասար է 160-ի, ինչը չափազանց բարձր ցուցանիշ է, հատկապես եթե հաշվի առնենք, որ նա դպրոցը լքել է 16 տարեկան հասակում։ Այդ նույն ցուցանիշն ունի, ի դեպ, Microsoft-ի հիմնադիր Բիլլ Գեյթսը։ Ինտելեկտի գործակցի առավելագույն մակարդակը հավասար է 180 միավորի։
3. «Կատաղի շները» ֆիլմը, որը հանդիսացավ Տարանտինոյի այցեքարտը մեծ կինոյում, նրա առաջին լիամետրաժ աշխատանքն էր։ Տարանտինոն ֆիլմի սցենարը գրել է ընդամենը երեք շաբաթվա ընթացքում։ Նա հույս չուներ, թե ֆիլմը կֆինանսավորվի, սակայն հանրաճանաչ դերասան Հարվի Քեյթելը, ով չափազանց հետաքրքրված էր սցենարով, օգնեց նրան հովանավորներ գտնելու գործում։
4. Իր կինոգործունեության ավելի քան քառասուն տարիների ընթացքում Տարանտինոն հանդես է եկել որպես 30 ֆիլմի սցենարիստ, 20 ֆիլմի պրոդյուսեր, 19 ֆիլմի ռեժիսոր։ Նա նաև դերասան է, օպերատոր, մոնտաժոր։
5. Տարանտինոն «Օսկարի» կրկնակի մրցանակակիր է՝ «Քրեական ընթերցվածք» (1994թ) և «Ազատագրված Ջանգոն» (2012թ) ֆիլմերի համար՝ «Լավագույն սցենար» անվանակարգում։
6. Տարանտինոյի ֆիլմերում առավել հաճախակի նկարահանվող դերասաններից է Սեմուել Լ․ Ջեքսոնը, ով հանդես է եկել նրա հինգ կինոնկարներում։ Ջեքսոնին հաջորդում է Զոի Բելլը, ով նկարահանվել է Տարանտինոյի չորս ֆիլմերում։ Իր ֆիլմերից երեքում Տարանտինոն աշխատել է Հարվի Քեյթելի, Թիմ Ռոթի և Մայքլ Բոուենի հետ։ Ումա Թուրմանին, ով նկարահանվել է Տարանտինոյի «Քրեական ընթերցվածք» և «Սպանել Բիլլին» ֆիլմերում, ռեժիսորը համարում է իր ստեղծագործական մուսան։
7. Տարանտինոն ֆիլմերում հաճախ է երևում կամեո դերերում։ Նրան, օրինակ, կարելի է տեսնել իր ընկերոջ՝ ռեժիսոր Ռոբերտ Ռոդրիգեսի «Խիզախը» և «Վախի մոլորակը» ֆիլմերի էպիզոդիկ դերերում, «Լրտեսուհին» ամերիկյան սերիալում, «Նիքին՝ կրտսեր Դևը» ֆիլմում և այլն։ Տարանտինոն սիրում է նկարահանվել նաև սեփական ֆիլմերում։ Նրան, այդպիսով, կարելի է տեսնել իր հեղինակած ֆիլմերից առնվազն 8-ում՝ «Իմ լավագույն ընկերոջ ծննդյան օրը» (1987թ), «Կատաղի շները» (1991թ), «Քրեական ընթերցվածք» (1994թ), «Չորս սենյակ» (1995թ), «Գրայնդհաուս» (2007թ), «Մահվան ապացույց» (2007թ), «Անփառունակ տականքները» (2009թ), «Ազատագրված Ջանգոն» (2012թ)։
8. Տարանտինոյի ֆիլմերը ճանաչելի են նախևառաջ իրենց ինքնատիպ ռեժիսորական ձեռագրի շնորհիվ։ Նրա ֆիլմերի հերոսները հաճախ վարում են տարածական երկխոսություններ, իսկ բռնության տեսարանները երկարաձգված են ու մատուցվում են գեղագիտական, ինչ-որ առումով նաև կատակերգական տեսանկյունից։
9. Տարանտինոյի ֆիլմերում հաճախ են պատահում կանացի մերկ ոտնաթաթերով կադրեր («Սպանել Բիլլին», «Ջեքի Բրաուն», «Անփառունակ տականքները» և այլն) կամ երկխոսություններ, որոնց ընթացքում քննարկվում են ոտքերը («Մահվան ապացույց», «Քրեական ընթերցվածք» և այլն)։ Բացի այդ՝ նրա ֆիլմերից յուրաքանչյուրում կա ռեստորանային մեկ կամ մի քանի տեսարան։
10. Տարանտինոյի պսակակիր ֆիլմը «Քրեական ընթերցվածքն» է, որն արժանացել է «Օսկարի», Բրիտանական կինոակադեմիայի երկու մրցանակի, Կաննի կինոփառատոնում՝ «Ոսկե արմավենու», «Ոսկե գլոբուս» մրցանակի, «Սատուռն» մրցանակի, ամերիկյան կինոքննադատների մրցանակին և մի շարք այլ պարգևների, որոնց ընդհանուր թիվը գերազանցում է 14-ը։
