«Կնոջ ուղեղը հանելուկ է։ Կանայք ունեն ուշադրության կարիք, նրանց հետ պետք է խոսել, փաղաքշել նրանց, նրբորեն որսալ նրանց տրամադրությունը, հիշել այն մասին, որ նրանք կան, ողջ են, հիշել այն մասին, թե որքան կարևոր են նրանք մեզ համար»։ «Խոսիր նրա հետ», 2002թ
«Խոսիր նրա հետ» դրաման իսպանացի ռեժիսոր Պեդրո Ալմոդովարը նկարահանել է 2002թ-ին: Սկզբում ֆիլմը միահյուսում է երկու տղամարդկանց կյանքի և սիրո պատմությունը. լրագրող Մարկոյի և կին ցլամարտիկ Լիդիայի ռոմանտիկ հարաբերությունների թեման զուգորդվում է բուժեղբայր Բենինյոյի և պարուհի Ալիսիայի պատմության հետ: Այս ֆիլմն իր բովանդակությամբ էապես տարբերվում է Ալմոդովարի մյուս գործերից: Իսպանացի ռեժիսորին իրավամբ կարելի է համարել ժամանակակից կինոյում կանանց գլխավոր գովերգու: «Խոսիր նրա հետ» ազդեցիկ մելոդրամում ներկայացված են սիրելի կանանց կորցնելու վտանգի առջև կանգնած երկու տղամարդիկ՝ իրենց ապրումներով և ստեղծված իրավիճակում ցուցաբերած տարբեր մոտեցումներով:
«Ես հավատում եմ հրաշքների, և դու էլ պիտի հավատաս»։ «Ե՞ս։ Ինչո՞ւ»։«Որովհետև դա քեզ պետք է։ Իսկ հիմա դու եթե նույնիսկ տեսնես հրաշքը, դու այն չես էլ նկատի»։
«Ես հարգում եմ մյուսների ֆոբիաները»։Ինչ-որ մի պահից սկսած՝ Ալմոդովարը դադարում է միաձուլել երկու պատմությունները, ավելի ճիշտ՝ նա Մարկոյին դարձնում է Բենինյոյի և Ալիսիայի պատմությանը հետևելու պրիզմա՝ ավարտին հասցնելով նաև նրա ու Լիդիայի պատմությունը (վերջինիս նախկին սիրեցյալն ասում է Մարկոյին, որ ճակատագրական ցլամարտից առաջ ինքը հաշտվել էր Լիդիայի հետ): Կինոնկարի ամենաշքեղ դրվագներից մեկը Բենինյոյի պատմած հերթական համր ֆիլմի տեսարանն է, երբ հերոսն, ընդունելով ընկերուհու պատրաստած էլիքսիրը, անասելի չափով փոքրանում է ու, մտնելով ընկերուհու հեշտոցի մեջ, անհետանում: Բենինյոյի ու Ալիսիայի միջև տեղի ունեցող սեռական ակտը սիմվոլիկ, այլընտրանքային ձևով ներկայացնող այս հատվածն ինչ-որ առումով նաև Բենինյոյի էության ու նրա պատմության փոխաբերական դրսևորումն է:
«Ի՞նչ գիտես դու կանանց մասին»։ «Ե՞ս։ Ամեն ինչ։ Ես 20 տարի անցկացրել եմ մի կնոջ հետ և 4 տարի՝ մյուսի»։
«Ամենատխուրը սերն է, որն ավարտվել է․․․»։
Մի քանի փաստ
Ֆիլմի սցենարի սկզբնաղբյուրը Ռումինիայի դիահերձարաններից մեկում տեղի ունեցած իրական պատմությունն է. աշխատակիցներից մեկը, ով փորձել է սեքսով զբաղվել լեթարգիական քնի վիճակում հայտնված և բժիշկների կողմից մահացած համարվող մի կնոջ հետ, արդյունքում արթնացրել է նրան: Եվ չնայած կնոջ ու նրա ընտանիքի երախտագիտությանը՝ ենթարկվել է քրեական հետապնդման:Ֆիլմը սկսվում է թատրոնի վարագույրի կադրով. այն նույն կադրով, որով ավարտվել էր ռեժիսորի նախորդ աշխատանքը՝ «Ամեն ինչ իմ մոր մասին»:
Ֆիլմի սկզբում ցուցադրվող ժամանակակից բալետի պարուհիներից մեկը գերմանացի լեգենդար խորեոգրաֆ Պինա Բաուշն է:
«Խոսիր նրա հետ» ֆիլմը ստացել է բազմաթիվ մրցանակներ, այդ թվում՝ «Օսկար»՝ լավագույն օրիգինալ սցենարի համար, «Ոսկե գլոբուս»՝ «Լավագույն օտարալեզու ֆիլմ» անվանակարգում, Եվրոպական կինոակադեմիայի մրցանակ՝ որպես տարվա լավագույն ֆիլմ:
Գլխավոր դերերը կատարող բոլոր դերասանների համար «Խոսիր նրա հետ» ֆիլմը առաջին համագործակցությունն է Պեդրո Ալմոդովարի հետ: Բենինյոյին մարմնավորող Խավիեր Կամարան հետագայում խաղացել է ռեժիսորի «Վատ դաստիարակություն» և «Ես շատ գրգռված եմ» ֆիլմերում: Իսկ Մարկոյի դերակատար Դարիո Գրանդինետիին կարելի է տեսնել ռեժիսորի վերջին ֆիլմում՝ «Ջուլյետայում»:
Լիլիթ Աղաջանյան
